រថយន្តលុចស៊ីស ៣០០ ព្រលះម៉ូតូ ឌ្រីមសង់ត្រង់ចំណុចផ្លូវជាបួន រងរបួសធ្ងន់ ស្រាលពីរនាក់

ភ្នំពេញ៖ បុរសជនជាតិចិនបីនាក់ បើករថយន្តមួយគ្រឿង លឿនពេក ដល់ចំណុចផ្លូវបែកជាបួនចាប់ហ្វ្រាំងមិនទាន់ ជ្រុលចង្កូតទៅបុកម៉ូតូមួយគ្រឿង ជិះដោយបុរសពីរនាក់ ពេញទំហឹង ខ្ទាតម៉ូតូទៅលើចិញ្ចើមផ្លូវ បណ្តាលបុរស ពីរនាក់រងបួសធ្ងន់ម្នាក់ ស្រាលម្នាក់។

ហេតុការណ៍នេះកើតឡើងកាលពីវេលាម៉ោង ៨-១០ នាទីយប់ ថ្ងៃទី ១៤ ខែ កញ្ញា ឆ្នាំ ២០១៨ ស្ថិតនៅចំណុច មុខភោជនីយដ្ឋាន រស្មីបឹងកក់ តាម បណ្តោយផ្លូវ ១៩៦៦កែងនិងផ្លូវ១០១១ ក្នុងសង្កាត់ភ្នំពេញថ្មី ខណ្ឌសែនសុខ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុ គេឃើញបុរស ជនជាតិបីនាក់បើករថយន្តលុចសុីស RX ៣០០ ពណ៌ស មួយគ្រឿង ពាក់ស្លាកលេខ ភ្នំពេញ 2AV-3551 ធ្វើដំណើរតាមបណ្តោយផ្លូវ ១៩៦៦ ទិសដៅពីលិចទៅកើត លុះដល់ផ្លូវបែក ជាបួន កែងផ្លូវ ១០១១ ចំណុចកើតហេតុ ខាងលើ ជ្រុលចង្កូតទៅបុកម៉ូតូមួយគ្រឿង ម៉ាកហុងដាឌ្រីមសង់ស៊េរី ០១៦ ពណ៌ខ្មៅ ពាក់ស្លាកលេខ ភ្នំពេញ 1FM-2192 ជិះដោយបុរសពីរនាក់ តាមបណ្តោយផ្លូវ ១០១១ ទិសដៅពីត្បូង ទៅជើង ពេញទំហឹង បណ្តាលឲ្យខ្ទាតម៉ូតូ ទៅលើចិញ្ចើមផ្លូវ ជាប់ទាំងស្លាកលេខ រថយន្តនៅជាប់ជាមួយម៉ូតូ ចំណែកជន រងគ្រោះដួលបោកនឹងថ្នល់រងរបួសធ្ងន់ម្នាក់ និងស្រាលម្នាក់ ត្រូវបានរុឺម៉កម៉ូតូ នៅក្បែរកន្លែងនោះ ដឹកយកទៅសង្គ្រោះ នៅមន្ទីរពេទ្យសែនសុខភ្លាមៗ  រីឯជនជាតិចិនពីរនាក់ បានទៅមើលជន រងគ្រោះនៅមន្ទីរពេទ្រផងដែរ ចំណែក ម្នាក់ទៀតនៅនិងកន្លែងកើតហេតុ។

ក្រោយកើតហេតុសមត្ថកិច្ចមូលដ្ឋានបានចុះមកដល់រងចាំភាគីទាំងសងខាងសម្របសម្រួសគ្នាដោយភាគីបង្កចេញថ្លៃព្យាបាលនិងជួលសជុលម៉ូតូទាំងអស់ដើម្បីចញ្ចប់រឿងនៅនិងកន្លែងកើតហេតុ៕