បើករថយន្ត CELICA លឿនពេក ព្រលះក្បាលនាគពុះចែកទ្រូងផ្លូវក្រឡាប់ផ្ងាច្រង៉ាង មុខផ្សារទួលគោក

ភ្នំពេញ៖ បុរសជនជាតិចិនម្នាក់បើករថយន្ត CELICA មួយគ្រឿង បោះពួយយ៉ាងលឿន ទៅបុកក្បាលនាគពុះចែកទ្រូងផ្លូវបាក់អស់មួយកង់រថយន្តក្រឡាប់ផ្ងាជើងឡើងលើសំណាងល្អអ្នកបើកបរមិនមានរងរបួស។

ហេតុការណ៍នេះកើតឡើងកាលពីវេលាម៉ោង ១៩ នឹង ២០នាទី ថ្ងៃទី ៤ ខែ សីហា ឆ្នាំ ២០១៩ ស្ថិតនៅចំណុចមុខផ្សារទួលគោក តាមបណ្តោយផ្លូវ ២៨៩ ក្នុងសង្កាត់បឹងកក់ ២ ខណ្ឌទួលគោក។

តាមប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុគេឃើញបុរសជនជាតិចិនម្នាក់បើករថយន្តមួយគ្រឿងម៉ាកTOYOTA CELICA ពណ៌ខ្មៅពាក់ស្លាកលេខភ្នំពេញ2O-1058ធ្វើដំណើរទិសដៅពីត្បូងទៅជើងបោះពួយយ៉ាងលឿនលុះមកដល់ចំណុចកើតហេតុខាងលើបានរេចង្កូតមកខាងឆ្វេងដៃជ្រុលទៅបុកក្បាលនាគពុះចែកទ្រូងផ្លូវពេញទំហឹងបណ្តាលឲ្យ បាក់អស់មួយកង់ចំណែករថយន្តបង្កក្រឡាប់ផ្ងាជើងឡើលើច្រង៉ាង។សំណាងល្អអ្នកបើកបរមិនមានរងរបួសរួចបានគេចខ្លួនចេញពីកន្លែងកើតហេតុបាត់ស្រមោល។

ក្រោយកើតហេតុសមត្ថកិច្ចមូលដ្ឋានបានចុះមកដល់បានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរងចាំដោះស្រាយគ្នាទៅតាមផ្លូវច្បាប់៕