រថយន្តត្រូវបានគេចាត់ទុកថា ជាយានជំនិះមួយមានថាមពលអាថ៌កំបាំង ស្ថិតនៅជាមួយម្ចាស់ជានិច្ច ទើបបានពេលគេទិញវាមកប្រើប្រាស់ គេតែងពិនិត្យពិច័យយ៉ាងល្អិតល្អន់បំផុត ។
មិនតែប៉ុណ្ណោះ ពេលខ្លះគេជ្រើសរើសទាំងពេលវេលា ថ្ងៃខែ ពណ៌សម្បុរឱ្យស្របទៅ នឹងជោគជតា រាសីរបស់ខ្លួន ដើម្បីឱ្យរបស់មួយនេះជួយនាំមកនូវភាពរីកចម្រើនដល់សង្គមគ្រួសារ ។ ក្រៅពីនោះ មុនពេលនាំចូលក្នុងផ្ទះ អ្នកខ្លះបានឆ្លងកាត់ពិធីកម្មបែបសាសនា ដើម្បីជួយបណ្តេញថាមពល ឬវិញ្ញាណចង្រៃ ឱ្យចេញពីក្នុងតួរថយន្តទៀត ផង ។
គេមានជំនឿថា ប្រសិនបើមានការធ្វេសប្រហែសឬប្រមាថ មិនបានឆ្លងកាត់ដូចអ្វីដែលបានពោលមកខាងលើទេនោះ អាចជួបនឹងសំណាងអាក្រក់ណាមួយមិនខាន ។
តាមក្បួនហុងស៊ុយ ដើម្បីជួយលោកអ្នកឲ្យមានអារម្មណ៍សប្បាយចិត្តបំផុត ពេលចូលទៅអង្គុយបើកបររថយន្ត ត្រូវអនុវត្តដូចខាងក្រោម:
អំបិលអាចជួយលោកអ្នកបាន
ប្រសិនបើលោកអ្នកទើបនឹងទិញរថយន្តចូលផ្ទះថ្មីៗ ជាពិសេសរថយន្តប្រភេទគេប្រើម្តងហើយ មុនពេលប្រើគួររោយអំបិលគ្រាប់ទៅលើរថយន្តទុកចោលមួយយប់ មុនពេលប្រើបើកបរ ព្រោះនៅក្នុងក្បួនហុងស៊ុយបុរាណចិនបានគូសបញ្ជាក់ប្រាប់យ៉ាងច្បាស់ថា អំបិលមានឥទ្ធិពលស័ក្តិសិទ្ធិបំផុតក្នុងការបណ្តេញថាមពល ឬវិញ្ញាណអាក្រក់ ដែលកំពុងសណ្ឋិតលាក់ខ្លួននៅក្នុងតួរថយន្ត ។ វិធីនេះ ក៏ណែនាំឱ្យលោកអ្នកប្រតិបត្តិ ក្រោយពេលជួបហេតុការណ៍អាក្រក់បើកប៉ះនេះ ប៉ះនោះទៀតផង ។
កញ្ចក់ទាំងអស់ត្រូវភ្លឺថ្លាជានិច្ច
លោកអ្នកគួរឧស្សាហ៍ដុសជូតកញ្ចក់ទាំងអស់ ឱ្យមានសភាពភ្លឺថ្លាស្អាតជានិច្ច ។ កញ្ចក់ទាំងអស់ក្នុងក្បួនហុងស៊ុយ បានចាត់ទុកវាប្រៀបដូចជាកែវភ្នែករបស់រថយន្ត ដូច្នេះប្រសិនបើវាស្រអាប់ងងឹត រថយន្តរបស់អ្នកអាចជួបនឹងឧប្បត្តិហេតុក្នុងពេលណាមួយដោយចៀសមិនផុត ។ ក្រៅពីនេះការធ្វើឱ្យកញ្ចក់មានសភាពភ្លឺថ្លាជាប់ជាប្រចាំ ក៏ជួយស្រូបយកថាមពលល្អពីខាងក្រៅចូលមកក្នុងរថយន្តបានសព្វទីកន្លែងផង ដែរ ។
រៀបចំរបស់របរនៅក្នុងរថយន្តឱ្យមានរបៀប
ដូចលោកអ្នកបានជ្រាបខ្លះៗមកហើយថា ថាមពល ឬ វិញ្ញាណអាក្រក់វាចូលចិត្តលាក់ ខ្លួននៅក្នុងទីងងឹត ឬកន្លែងស្តុកស្មោកគ្រោកគ្មានរបៀប ។ ដូច្នេះប្រសិនបើមានពេលវេលាទំនេរ លោកអ្នកគួរឆ្លៀតឱកាសរៀបចំឱ្យមានរបៀប និងសម្អាតឱ្យបានស្អាតរាល់ថ្ងៃ ដើម្បីស្រូបយកសិរីមង្គលចូលមកសណ្ឋិតក្នុងរថយន្តជួយឱ្យជួបសំណាងល្អជាប់រហូតមិនដាច់ ។
បើកបទចម្រៀងតិចៗនៅពេលបើកបរ
បទចម្រៀងស្រាលៗ វាជួយសម្រួលថាមពលក្តៅដែលមាននៅក្នុងរថយន្ត ជួយឱ្យការបើកបរមានភាពរលូនទៅមុខបានទៅដល់គោលដៅចុងក្រោយយ៉ាងសុវត្ថិភាព ។
ការរៀបរាប់មកខាងលើនេះ សុទ្ធសឹងជាការនាំមកនូវសិរីសួស្តី ភាពរីកចម្រើនសុខសប្បាយដល់អ្នកប្រើប្រាស់ ទោះបីលោកអ្នកគ្មានជំនឿទៅលើរឿងនេះ ក៏កុំប្រមាថ ព្រោះជារឿងដែលមិនអាចពិសោធន៍បាន មើលមិនឃើញ ដែលយ៉ាងហោចណាស់ក៏សូមឱ្យគិតថា ជីវិតលោកអ្នកផ្ញើទៅលើយានជំនិះរាល់ថ្ងៃព្រឹកល្ងាច ៕
ការថែទាំរថយន្តដើម្បីលើកហុងស៊ុយ
Reviewed by សារព័ត៌មាន ឯករាជ្យជាតិ
on
9:30:00 PM
Rating:
Reviewed by សារព័ត៌មាន ឯករាជ្យជាតិ
on
9:30:00 PM
Rating:
No comments: