ជិះម៉ូតូចេញពីទិញសាច់កាប់ ជ្រុលទៅ បុករថយន្តធុនធំ ដឹកមេស៊ីម៉ងត៍ ពីចំហៀង ខ្ទាតចូលក្រោមកង់រថយន្ត កិនបែកក្បាលស្លាប់ភ្លាមៗ

ភ្នំពេញ ៖ បុរសម្នាក់ត្រូវបានរថយន្តដឹក មេស៊ីម៉ងត៍ កិនបែកក្បាលស្លាប់យ៉ាង អាណោចអធ័ម បន្ទាប់ពីជនរងគ្រោះ ជិះម៉ូតូចេញពីទិញម្ហូប ហើយឆ្លងផ្លូវ ជ្រុលទៅបុករថយន្តដឹកមេស៊ីម៉ងត៍ពីចំហៀង ហើយខ្ទាតចូលក្រោមកង់រថយន្ត កាលពីវេលាម៉ោង ៩ នឹង ៥០នាទីយប់ ថ្ងៃទី ១៧ ខែកញ្ញា ឆ្នាំ ២០១៨ ស្ថិតនៅ ចំណុចមុខ វត្តស្លែង តាមបណ្ដោយផ្លូវ ជាតិលេខ ៣ ស្ថិតក្នុងសង្កាត់ក្រាំងពង្រ ខណ្ឌដង្កោ។

មានទទួលផ្សាយពាណិជ្ជកម្ម ទំនាក់ទំនងទូរស័ព្ទលេខ 016 85 63 66

សមត្ថកិច្ចជំនាញបានឲ្យដឹងថា ជនរងគ្រោះដែលស្លាប់ បាត់បង់ជីវិតមានឈ្មោះ ម៉ៅ ចំណាន ភេទប្រុស អាយុ ៣៦ឆ្នាំ មុខរបប ចុងភៅ មានស្រុកកំណើតនៅភូមិព្នៅ ឃុំត្រពាំងគង ស្រុកសំរោងទង ខេត្តកំពង់ស្ពឺ ដោយជិះម៉ូតូម៉ាក VIVA ពណ៌ខ្មៅ ពាក់ស្លាកលេខ កំពង់ស្ពឺ 1C-2111 ។  ចំណែក តៃកុងរថយន្តបង្កមានឈ្មោះ ទូច វាសនា ភេទប្រុស អាយុ ១៩ឆ្នាំ មុខរបបបើកបររថយន្ត រស់នៅភូមិត្រាំក្បាល ឃុំក្រាងលាវ ស្រុកបាទី ខេត្តតាកែវ ។ដោយបើកបរ រថយន្តម៉ាក RHINO ពណ៌ក្រហម ពាក់ស្លាកលេខ ក្រុងព្រះសីហនុ 3A-6306 ។
       តាមប្រភពព័ត៌មានពីសមត្ថកិច្ចដែលប្រចាំការក្បែរកន្លែងកើតហេតុបានឲ្យដឹងថា នៅពេលកើតហេតុ ជនរងគ្រោះបាន ជិះម៉ូតូចេញពីទិញម្ហូប បានធ្វើដំណើរតាមផ្លូវព្រៃសរ ហើយឆ្លងទៅផ្លូវជាតិលេខ ៣ បំរុងទៅទិសខាងត្បូង ស្របពេលនោះ ក៏មានរថយន្តដឹកមេសុីម៉ង បានធ្វើដំណើរ តាមបណ្ដោយផ្លូវជាតិលេខ ៣ ទិសដៅពីជើង ត្បូងក្នុង ល្បឿនលឿន ហើយក៏ត្រូវជនរងគ្រោះជិះម៉ូតូបុករថយន្ត ពីចហៀង បណ្ដាលឲ្យជនរងគ្រោះខ្ទាតចូលក្រោម រថយន្តកិនបែកក្បាលធ្លាយខួរស្លាប់យ៉ាងអាណោចអធ័ម រីឯម៉ូតូខូចខាតតិចតួត ។

ក្រោយកើតហេតុ រថយន្តដឹកមេសុីម៉ងត៍ មិនព្រមឈប់នៅ កន្លែងកើតហេតុនោះទេ ដោយព្យាយាមបើកគេចខ្លួន តែត្រូវ សមត្ថកិច្ចដែលនៅក្បែរនោះ ដេញតាមឃាត់បាន ទាំងរថយន្ត និងតៃកុងតែម្ដង ។ បន្ទាប់មកសមត្ថកិច្ចជំនាញចរាចរណ៍ បានចុះមកធ្វើការវាស់វែង យកម៉ូតូ និងរថយន្តព្រមទាំងតៃកុង ប្រគល់ឲ្យការិយាល័យចរាចរណ៍ជើងគោក នៃស្នងការដ្ឋាន នគរបាល រាជធានីភ្នំពេញ ចាត់ការតាមនីតិវិធី ។ ចំណែកសពជនរងគ្រោះ សមត្ថកិច្ចក៏បានធ្វើកំណត់ហេតុ ប្រគល់ឲ្យសាច់បងប្អូនយកទៅធ្វើបុណ្យនៅឯស្រុកកំណើត តាមប្រពៃណី៕