ភ្នំពេញ៖ បុរសម្នាក់បើករថយន្តស៊េរីទំនើបម៉ាកឡង់គ្រីស័រ ស្លាកលេខខេមរភូមិន្ទ មួយគ្រឿង ក្នុងស្ថានភាពស្រវឹង ខ្វះការប្រុងប្រយ័ត្ន បានរេចង្កូតបុករះរថយន្តបីគ្រឿង រងការខូចខាតយ៉ាងដំណំ តែសំណាងល្អមិនបង្កឲ្យមានអ្នករងរបួស។
ហេតុការណ៌នេះកើតឡើងនៅវេលាម៉ោង ៩ នឹង ៣០នាទីយប់ ថ្ងៃទី ១ ខែ កុម្ភៈ ឆ្នាំ ២០១៩ ស្ថិតតាមបណ្ដោយផ្លូវ ២៨៩ ចំណុចរង្វង់មូលទួលគោក ក្នុងសង្កាត់បឹងកក់ ២ ខណ្ឌទួលគោក។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុ គេឃើញបុរសវ័យចំណាស់ម្នាក់ បើករថយន្តទំនើបម៉ាកឡង់គ្រីស័រ ពណ៌ត្រីអ៊ី មួយគ្រឿង ពាក់ស្លាកលេខ ខេមរភូមិន្ទ 02-2-5449 ក្នុងទិសដៅពីជើងទៅត្បូង ក្នុងល្បឿនលឿន ដោយស្ថានភាពស្រវឹង ខណៈមកដល់ចំណុចកើតហេតុខាងលើ បានរេចង្កូតទៅរថយន្តមួយគ្រឿង ម៉ាកលុចស៊ីស RX330 ពណ៌ស ពាក់ស្លាកលេខ ភ្នំពេញ 2AW-2175 ចំហៀងខាងឆ្វេងខូចខាតយ៉ាងដំណំ ហើយរថយន្តបង្កបន្តទៅ បុករថយន្តមីតស៊ុយមីស៊ីមួយគ្រឿងទៀត ពណ៌សំប៉កឪឡឹក ពាក់ស្លាកលេខ កំពត 2A-0882 បញ្ឆិតផ្នែកខាងមុខខាងឆ្វេង រងការខូចខាត និងបណ្តាលឲ្យរថយន្តមីតស៊ុយមីសីុ រុញទៅបុករថយន្តមួយគ្រឿង ម៉ាកហាយប្រ៊ីត ពណ៌ស ពាក់ស្លាកលេខ ភ្នំពេញ 2N-5565 ចំផ្នែកខាងមុខរងការខូច។ ថយន្តទាំងបីគ្រឿងបើកបញ្ច្រាស់ទិសដៅគ្នាពីត្បូងទៅជើង រីឯរថយន្តបង្កខូចខាតផ្នែកខាងមុខយ៉ាងដំណំ តែសំណាងល្អមិនបង្កឲ្យមានអ្នករងរបួស។
ក្រោយកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ បានអោយភាគីខាងរថយន្តបង្កសម្របសម្រួលជាមួយរថយន្តរងគ្រោះ ដោយដោះស្រាយមិនត្រូវគ្នាទើបសមត្ថកិច្ចទាក់ទងជំនាញ មកវាស់វែងយករថយន្តទាំង ៤គ្រឿង ទៅរក្សាទុកនៅការិយាល័យចរាចរណ៍ ផ្លូវគោក រងចាំដោះស្រាយតាមផ្លូវច្បាប់។
បើករថយន្តស្លាលលេខខេមរភូមិន្ទ លឿនមិនប្រយ័ត្ន ជ្រុលទៅបុករះរថយន្តបីគ្រឿងរងការខូចខាតយ៉ាងដំណំ
Reviewed by សារព័ត៌មាន ឯករាជ្យជាតិ
on
7:23:00 PM
Rating:
No comments: