បើករថយន្តក្រឡុុកស៊ីម៉ងត៍លឿនពេក ជ្រុលទៅបុកម៉ូតូ ស្លាប់យុវជនម្នាក់ និងម្នាក់រងរបួសធ្ងន់

ភ្នំពេញ៖ បុរសម្នាក់បើករថយន្តក្រឡុុកស៊ីម៉ងត៍លឿនពេក ជ្រុលទៅបុកម៉ូតូយុវជនម្នាក់ស្លាប់ភ្លាមៗ និងម្នាក់ទៀតរងរបួសធ្ងន់ ហើយព្យាយាមបើករត់ ត្រូវសមត្ថកិច្ចឃាត់ខ្លួនបានទាំងតៃកុង និងរថយន្ត។

ហេតុការណ៍ដ៍រន្ធត់នេះកើតឡើងនៅវេលាម៉ោង ១១ នឹង ៥០នាទីយប់ ថ្ងៃទី ៣០ ខែ មករា ឆ្នាំ ២០១៨ ស្ថិតនៅចំណុចផ្លូវលេខ ៣១០ កែងផ្លូវ ៦៣ ក្នុងសង្កាត់បេងកែងកង ១ ខណ្ឌចំកាមន។

សពជនរងគ្រោះមានឈ្មោះ ផល សុវណ្ណ បញ្ញា ភេទប្រុស អាយុ ១៨ ឆ្នាំ មុចរបរសិស្សថ្នាក់ទី ១០ វិទ្យាល័យព្រះសុីសុវត្តិ ស្នាក់នៅផ្សាររន្ទះបាញ់ ក្នុងសង្កាត់ទន្លេបាសាក់ ខណ្ឌចំកាមន រាជធានីភ្នំពេញ។

ទាញយកកម្មវិធី ព័ត៌មាន ឯករាជ្យជាតិ សំរាប់ទូរសព្ទ Android

តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញរថយន្តក្រឡុកស៊ីម៉ងត៍ ពណ៌ស ពាក់ស្លាកលេខ ភ្នំពេញ 5A-0125 បើកបរដោយបុរសម្នាក់តាមផ្លូវលេខ ៦៣ ទិសដៅ ពីជើងទៅត្បូង ក្នុងល្បឿនលឿន ខណៈមកដល់ចំណុច កើតហេតុខាងលើ ផ្លូវលេខ ៣១០ ​បានជ្រុលទៅបុកម៉ូតូឌ្រីមសង់ ០១១ ពណ៌ខ្មៅ ពាក់ស្លាកលេខ ភ្នំពេញ 1N-8924ជិះដោយ យុវជនពីរនាក់តាមផ្លូវលេខ ៣១០ ទិសដៅ ពីកើតទៅលិច ពេញទំហឹង បណ្ដាលឲ្យយុវជនម្នាក់ ត្រូវរថយន្តកិនចំក្បាលបែកខួរស្លាប់ គួរអោយរន្ធត់ និងម្នាក់ទៀត រងរបួសធ្ងន់ត្រូវបានរថយន្តសង្គ្រោះដឹកយកទៅសសង្គ្រោះភ្លាមៗ ចំណែករថយន្តបង្ករ មិនព្រមឈប់ទទួលខុសត្រូវ ព្យាយាមបើករត់បានប្រហែល ២០០ ម៉ែត្រ ទើបសមត្ថកិច្ចឃាត់ខ្លួនបានតែម្ដង។

ក្រោយកើតហេតុ សមត្ថកិច្ចមូលដ្ឋានទាក់ទងហៅជំនាញមកស្ទូចរថយន្ដ និងម៉ូតូទៅការរិយាល័យចរាចរណ៍ជើងគោក រងចាំដោះស្រាយ នៅពេលក្រោយ។ ចំណែកសពជនរងគ្រោះ ត្រូវសមត្ថកិច្ចប្រគល់ជូនសាច់ញាតិយកទៅធ្វើបុណ្យតាមប្រពៃណី៕ ស៊ីន កុសល