បើករថយន្តលឿនមិនប្រយ័ត្ន បុករបាំងថ្មពុះចែកទ្រូងផ្លូវ មុខព្រលានយន្តហោះ បាក់អស់មួយកង់

ភ្នំពេញ​៖​ រថយន្តម៉ាកឡិចស៊ីស បេីកលឿនពេក ជ្រុលទៅបុករបាំងថ្មពុះចែកទ្រូងផ្លូវ បាក់អស់មួយកង់ និងរងការខូចខាត ២កង់ទៀត ចំណែករថយន្តរងការខូចខាតទៅមុខលែងរួច។

ហេតុការណ៍​នេះបានកេីតឡេីងកាលពីវេលាម៉ោង ១០យប់ ថ្ងៃទី ២២ ខែ ឧសភា​ ឆ្នាំ ២០១៩​ នៅចំណុចខាងលិចស្តុបអាកាសយានដ្ឋានអន្តរជាតិភ្នំពេញ (ច្រកទី២)​ តាមមហាវិថីសហព័ន្ធរុស្ស៊ី​ ស្ថិតក្នុងសង្កាត់កាកាបទី ២​ ខណ្ឌពោធិ៍សែនជ័យ​។

តាមសាក្សីនៅកន្លែងកេីតហេតុបានឲ្យដឹងថា​ មុនពេលកេីតហេតុគេបានឃេីញរថយន្តម៉ាកឡិចស៊ីស ពណ៌ខ្មៅ ពាក់ស្លាកលេខ ភ្នំពេញ 2T-4688 បេីកបរដោយបុរសជនជាតិចិន​ ធ្វេីដំណេីរតាមមហាវិថីសហព័ន្ធរុស្ស៊ី ក្នុងទិសដៅពីកេីតទៅលិច ខណៈមកដល់ចំណុចកេីតហេតុ ដោយសារមេីលមិនឃេីញ ព្រោះរបាំងថ្មពុំមានចំណាំងផ្លាត និងងងិតផងនោះ ក៏រេចង្កូតទៅបុកក្បាលនាគពេញទំហឹង បណ្តាលអោយរងការខូចខាតដួលមួយកង់ ចំណែក ២កង់ទៀត ប្រេះស្រាំរងការខូចខាត ដោយឡែករថយន្តបែកកង់ខាងឆ្វេងទៅមុខលែងរួច។

ក្រោយកេីតហេតុ សមត្ថកិច្ចមូលដ្ឋានបានចុះទៅដល់ចំណុចកេីតហេតុ និងទំនាក់ទំនងទៅជំនាញមកស្ទូចយករថយន្តទៅរក្សាទុកនៅ ការិយាល័យចរាចរណ៍ជេីងគោក រាជធានី រងចាំដោះស្រាយតាមច្បាប់៕